ഗുരുവായൂർ ക്ഷേത്രത്തിൽ വ്യാഴാഴ്ച്ച ബിംബശുദ്ധി നടത്തും
ഗുരുവായൂര്‍: ഗുരുവായൂര്‍ ക്ഷേത്രത്തില്‍ ശ്രീഗുരുവായൂരപ്പന് ബിംബശുദ്ധി വ്യാഴാഴ്ച്ച നടത്തും. ഭഗവത് ചൈതന്യത്തെ വിശേഷേണ ഗ്രഹിച്ചിട്ടുള്ള വിഗ്രഹത്തില്‍ അറിഞ്ഞോ, അറിയാതേയോ സംഭവിച്ച അശുദ്ധി നീക്കുകയെന്നതാണ് ബിംബ ശുദ്ധി കര്‍മ്മത്തിന്റെ ലക്ഷ്യം. ബിംബശുദ്ധിയോടനുബന്ധിച്ച് നാളെ രാവിലെ ശീവേലിയ്ക്കുശേഷം 9.30-വരെ ഭക്തജനങ്ങള്‍ക്ക് നാലമ്പലത്തിനകത്തേയ്ക്ക് പ്രവേശനമുണ്ടായിരിയ്ക്കയില്ല. എന്നാല്‍ ക്ഷേത്രം ചുറ്റമ്പലത്തില്‍ പ്രവേശിച്ച് ദര്‍ശനം നടത്താനും, വഴിപാടുകള്‍ നടത്തുന്നതിനും തടസ്സമുണ്ടാകില്ല.
ക്ഷേത്രത്തിലെ ഉപദേവതയായ ഇടത്തരികത്തുകാവില്‍ ഭഗവതിയ്ക്ക് വാര്‍ഷിക ശുദ്ധി ചടങ്ങുകള്‍ സമാപിച്ചു. രാവിലെ ക്ഷേത്രം തന്ത്രി ചേന്നാസ് ശ്രീകാന്ത് നമ്പൂതിരിപ്പാടിന്റെ നേതൃത്വത്തില്‍ ഭഗവതിയ്ക്ക് 108-കലശം അഭിഷേകം ചെയ്തു. തുടര്‍ന്ന് ബ്രഹ്മകലശത്തോടേയാണ് ചടങ്ങുകള്‍ പര്യവസാനിച്ചത്. ചടങ്ങില്‍ ദേവസ്വം ചെയര്‍മാന്‍ അഡ്വ: കെ.ബി. മോഹന്‍ദാസ്, ഭരണസമിതി അംഗങ്ങളായ മല്ലിശ്ശേരി പരമേശ്വരന്‍ നമ്പൂതിരിപ്പാട്, പി. ഗോപിനാഥന്‍, കെ.കെ. രാമചന്ദ്രന്‍ കൂടാതെ ഭക്തജനങ്ങളും പങ്കെടുത്തു.
