Category Archives: Music

പ്രശസ്ത വയലിനിസ്റ്റ് പത്മഭൂഷന്‍ പ്രൊഫ. ടി.എന്‍. കൃഷ്ണന്‍ അന്തരിച്ചു.

ചെന്നൈ: പ്രശസ്ത വയലിനിസ്റ്റും പത്മഭൂഷന്‍ ജേതാവുമായ പ്രൊഫ. ടി.എന്‍. കൃഷ്ണന്‍(92) അന്തരിച്ചു. വാര്‍ധക്യ സഹജമായ അസുഖങ്ങളെത്തുടര്‍ന്ന് ചെന്നൈയിലെ വസതിയിലായിരുന്നു അന്ത്യം. വയലിനില്‍ നാദവിസ്മയം സൃഷ്ടിച്ച കൃഷ്ണന്‍, രാജ്യത്തിനകത്തും വിദേശത്തുമായി ഇരുപത്തയ്യായിരത്തില്‍ അധികം കച്ചേരികള്‍ അവതരിപ്പിച്ചിട്ടുണ്ട്.

തൃപ്പൂണിത്തുറ ഭാഗവതര്‍മഠത്തില്‍ എ. നാരായണ അയ്യരുടെയും അമ്മിണി അമ്മാളിന്റെയും മകനായി 1928 ഒക്ടോബര്‍ ആറിനാണ് ജനനം. അച്ഛനായിരുന്നു സംഗീതത്തില്‍ ഗുരു. മൂന്നാംവയസ്സു മുതല്‍ വയലിന്‍ പഠിച്ചു തുടങ്ങിയ കൃഷ്ണന്‍, ഏഴാം വയസ്സില്‍ പൂര്‍ണത്രയീശ ക്ഷേത്രത്തില്‍ അരങ്ങേറ്റം കുറിച്ചു. തുടര്‍ന്ന് അനവധി വേദികളില്‍ വയലിനില്‍ നാദവിസ്മയം തീര്‍ത്തു. പ്രശസ്ത ഹിന്ദുസ്ഥാനി സംഗീതജ്ഞ ഡോ. എന്‍. രാജം, കൃഷ്ണന്റെ സഹോദരിയാണ്.

ചെമ്പൈ വൈദ്യനാഥ ഭാഗവതര്‍, അരിയക്കുടി രാമാനുജ അയ്യങ്കാര്‍, ശെമ്മാങ്കുടി ശ്രീനിവാസയ്യര്‍, മുസിരി സുബ്രഹ്മണ്യയ്യര്‍, മധുരൈ മണി അയ്യര്‍ തുടങ്ങിയ പ്രമുഖര്‍ക്കെല്ലാം വയലിന്‍ വായിച്ചിട്ടുണ്ട്. കേന്ദ്ര സംഗീതനാടക അക്കാദമി വൈസ് ചെയര്‍മാനായും പ്രവര്‍ത്തിച്ചിട്ടുണ്ട്.

പാലക്കാട് നെന്മാറ അയിരൂര്‍ സ്വദേശിനിയായ കമലയാണ് ഭാര്യ. മക്കള്‍: വിജി കൃഷ്ണന്‍, ശ്രീറാം കൃഷ്ണന്‍. ശ്രീറാം കൃഷ്ണന്‍ അറിയപ്പെടുന്ന വയലിനിസ്റ്റാണ്. പത്മശ്രീ, കേന്ദ്ര സംഗീത നാടക അക്കാദമി പുരസ്‌കാരം, മദ്രാസ് മ്യൂസിക്ക് അക്കാദമിയുടെ സംഗീത കലാനിധി പുരസ്‌കാരം, സ്വാതി സംഗീത പുരസ്‌കാരം തുടങ്ങി നിരവധി പുരസ്‌കാരങ്ങള്‍ നേടിയിട്ടുണ്ട്.

കര്‍ണാടക സംഗീതത്തിലെ വയലിന്‍ ത്രയങ്ങള്‍ എന്നറിയപ്പെട്ട മൂവരില്‍ ഒരാളാണ് കൃഷ്ണന്‍. ലാല്‍ഗുഡി ജയരാമന്‍, എം.എസ്. ഗോപാലകൃഷ്ണന്‍ എന്നിവരായിരുന്നു മറ്റ് രണ്ട് പേര്‍. ചെന്നൈ മ്യൂസിക് അക്കാദമിയില്‍ അധ്യാപകനായി ചേര്‍ന്ന കൃഷ്ണന്‍ പ്രിന്‍സിപ്പലായാണ് വിരമിച്ചത്. ഡല്‍ഹി യൂണിവേഴ്‌സിറ്റിയിലെ മ്യൂസിക് വിഭാഗം ഡീനായും പ്രവര്‍ത്തിച്ചിട്ടുണ്ട്.

സുവര്‍ണ നാലപ്പാട്ട് ട്രസ്റ്റ് പുരസ്‌കാരം ഫാ.പോള്‍ പൂവ്വത്തിങ്കലിന്

ഗുരുവായൂര്‍: ഡോ.സുവര്‍ണ നാലപ്പാട്ട് ട്രസ്റ്റിന്റെ ഈ വര്‍ഷത്തെ പുരസ്‌കാരത്തിന് സംഗീതജ്ഞനും തൃശ്ശൂര്‍ ചേതന മ്യൂസിക് കോളേജ് പ്രിന്‍സിപ്പലുമായ ഫാ.പോള്‍ പൂവ്വത്തിങ്കലിനെ തിരഞ്ഞെടുത്തു.വെള്ളിയാഴ്ച രാവിലെ ഒമ്പതിന് ഗുരുവായൂര്‍ റിസോര്‍ട്ട് ഹാളില്‍ നടക്കുന്ന ട്രസ്റ്റിന്റെ വാര്‍ഷിക ചടങ്ങില്‍ പുരസ്‌കാരം നല്‍കും. നോവലിസ്റ്റ് സി.രാധാകൃഷ്ണന്‍ ഉദ്ഘാടനം ചെയ്യും.ആഷാ മേനോന്‍ മുഖ്യപ്രഭാഷണം നടത്തും.അശോകന്‍ നാലപ്പാട്ട് അനുസ്മരണവും നടക്കും.

ശബരിമലയിൽ സുപ്രീം കോടതി വിധി നടപ്പാക്കിയേ തീരൂ : ഗവർണർ

തിരുവനന്തപുരം: നവോത്ഥാനത്തിനും ലിംഗസമത്വത്തിനും സാമൂഹ്യ നീതിക്കും വേണ്ടി സംസ്ഥാന സര്‍ക്കാര്‍ നിലകൊള്ളുന്നുവെന്ന് ഗവര്‍ണര്‍ പി സദാശിവം. നിയമസഭ ബജറ്റ് സമ്മേളനത്തിന് മുന്നോടിയായി ഗവര്‍ണ്ണര്‍ നടത്തിയ നയപ്രഖ്യാപന പ്രസംഗത്തില്‍ കേന്ദ്രസര്‍ക്കാരിന്റെ സംസ്ഥാനത്തോടുള്ള സമീപനത്തെയും വിമര്‍ശിച്ചു. ഫെബ്രുവരി ഏഴ് വരെയാണ് നിയമസഭാ സമ്മേളനം. ജനുവരി 31നാണ് സംസ്ഥാന ബജറ്റ്. ഇതിനു മുന്നോടിയായുള്ള നയപ്രഖ്യാപനമാണ് ഗവര്‍ണ്ണര്‍ ജസ്റ്റിസ് പി സദാശിവം നടത്തിയത്.

. പ്രസംഗത്തിന് തൊട്ടുമുമ്പ് ‘പ്രളയബാധിതരോട് നീതി കാണിക്കുക’ എന്ന ബാനറുകളുമായി പ്രതിപക്ഷം പ്രതിഷേധിച്ചു. ‘എന്‍റെ പ്രസംഗം ശ്രദ്ധിക്കൂ’ എന്ന് പ്രതിപക്ഷത്തോട് ഗവർണർ പറ‌ഞ്ഞു. ശബരിമലയിൽ സുപ്രീംകോടതി വിധി നടപ്പാക്കാൻ സർക്കാർ പ്രതിജ്ഞാബദ്ധമാണെന്ന് പറഞ്ഞതോടെ പ്രതിപക്ഷത്തിന്‍റെ ഭാഗത്തു നിന്ന് ചെറിയ ബഹളവും പ്രതിഷേധവുമുണ്ടായി. വികസനം നേടിയെന്ന അടിസ്ഥാനത്തിൽ കേന്ദ്രസർക്കാ‍ർ സംസ്ഥാനത്തിന് സഹായം നിഷേധിക്കുകയാണെന്ന കുറ്റപ്പെടുത്തലും ഗവർണർ നയപ്രഖ്യാപനത്തിൽ നടത്തി.

‘പ്രിയപ്പെട്ട സാമാജികരേ എല്ലാവർക്കും എന്‍റെ നമസ്കാരം’ എന്ന് മലയാളത്തിൽ പറ‌ഞ്ഞുകൊണ്ടാണ് ഗവർണർ പ്രസംഗം തുടങ്ങിയത്. വർഗീയതയുടെ പേരിൽ കേരളത്തിൽ പ്രതിസന്ധികളുണ്ടായപ്പോഴും ഭരണഘടനയിലെ മൂല്യങ്ങൾ ഉയർത്തിക്കാട്ടിയാണ് സർക്കാർ ഭരണം തുടരുന്നതെന്ന് ഗവർണർ പറഞ്ഞു. ലിംഗനീതിയിലുറച്ചാണ് സർക്കാർ മുന്നോട്ടുപോകുന്നത്. നവോത്ഥാനമൂല്യങ്ങൾ ഉയ‍ർത്തിപ്പിടിച്ച് ഒറ്റക്കെട്ടായി മുന്നോട്ടുപോകുമെന്നും ഗവർണർ വ്യക്തമാക്കി.

ശബരിമലയിൽ സ്ത്രീപ്രവേശം ഉറപ്പാക്കാനുള്ള സുപ്രീംകോടതി വിധി നടപ്പിലാക്കാൻ സർക്കാർ പ്രതിജ്ഞാബദ്ധമാണ്. ലിംഗനീതിയിൽ അടിയുറച്ച് വിശ്വസിച്ചാണ് സർക്കാർ മുന്നോട്ടുപോകുന്നത്. നവോത്ഥാനസംഘടനകളുടെ സഹായത്തോടെ സർക്കാർ സംഘടിപ്പിച്ച വനിതാമതിൽ വൻ വിജയമായിരുന്നു. മുപ്പത് ലക്ഷം സ്ത്രീകൾ വനിതാമതിലിൽ അണിനിരന്നു. ചരിത്രനേട്ടമായിരുന്നു ഇത്. നവോത്ഥാനമൂല്യങ്ങൾ വരുംതലമുറയ്ക്കും മനസ്സിലാക്കാൻ ഒരു നവോത്ഥാനമ്യൂസിയം നിർമിക്കാൻ സർക്കാർ പദ്ധതിയിടുന്നു. കേരളം ഇപ്പോഴും മാനവവിഭവശേഷി വികസനസൂചികകളിൽ മുന്നിലാണ്. ഏറ്റവും പുതിയ ക്രൈം റെക്കോ‍ഡ്സ് ബ്യൂറോേ കണക്ക് പ്രകാരം വർഗീയകലാപങ്ങൾ നടക്കാത്ത ഏകസംസ്ഥാനം കേരളമാണെന്നും ഗവർണർ പറഞ്ഞു. നൂറ്റാണ്ടിലെ ഏറ്റവും വലിയ പ്രളയത്തിൽ കേരളം തകർന്നടിഞ്ഞതിനെക്കുറിച്ചും രക്ഷാപ്രവർത്തനങ്ങളും പുനരധിവാസപദ്ധതികളെക്കുറിച്ചും പ്രസംഗത്തിൽ ഗവർണർ ഊന്നിപ്പറഞ്ഞു. പ്രളയം നേരിടാൻ സർക്കാർ പരമാവധി എല്ലാ മാർഗങ്ങളും ഉപയോഗിച്ചു. പ്രളയക്കെടുതിയ്ക്കിടയിലും നൽകിയ വാഗ്ദാനങ്ങൾ പരമാവധി പാലിക്കാൻ സ‍ർക്കാർ ശ്രമിച്ചു. കേരളത്തിന്‍റെ 100 വ‍ർഷത്തിന്‍റെ ചരിത്രത്തിൽ ഇത്ര വലിയ പ്രളയമുണ്ടായിട്ടില്ല. ലക്ഷക്കണക്കിന് പേ‍ർ ദുരിതാശ്വാസക്യാംപുകളിലായി, നൂറുകണക്കിന് പേ‍ർ മരിച്ചു. കേന്ദ്രസേനകളെ നിയോഗിച്ച് രക്ഷാപ്രവർത്തനം നടത്തി. സഹായം ആവശ്യമുള്ള എല്ലാവർക്കും അടിയന്തരധനസഹായം നൽകി. തക‍ർന്നടിഞ്ഞ അടിസ്ഥാനസൗകര്യമേഖലയിൽ അടിയന്തരഅറ്റകുറ്റപ്പണികൾ നടത്തി. ഉടനടി സഹായം നൽകാൻ അകമഴിഞ്ഞ് സഹായം നൽകിയ മറ്റ് സംസ്ഥാനസർക്കാരുകളെയും, വിദേശമലയാളികളെയും നന്ദിയോടെ ഓർക്കുന്നു. സ്കൂൾ കുട്ടികളുൾപ്പടെ കേരളത്തിലെ ജനങ്ങൾ നൽകിയ ചെറുതുകകൾക്ക് നന്ദി. സാലറി ചാലഞ്ചിലൂടെ ഒരു മാസത്തെ ശമ്പളം നൽകാൻ തയ്യാറായവർക്കും നന്ദി. പുനരധിവാസം ഉറപ്പാക്കാനുള്ള പണം കണ്ടെത്തുക എന്നതാണ് സ‍ർക്കാരിന് മുന്നിലുള്ള വെല്ലുവിളി. അടിസ്ഥാനസൗകര്യവികസനവും വെല്ലുവിളിയാണ്. അതിനുള്ള ഫണ്ടുകൾ കണ്ടെത്താനുള്ള ശ്രമങ്ങൾ ഊർജിതമായി മുന്നോട്ടുകൊണ്ടുപോകുമെന്നും ഗവർണർ. സാമ്പത്തികരംഗത്തുൾപ്പടെ കേന്ദ്ര-സംസ്ഥാനബന്ധം ഉലഞ്ഞ അവസ്ഥയിലാണ്. കേന്ദ്രവും സംസ്ഥാനവുമായുള്ള ബന്ധം പരമാവധി നല്ല നിലയിൽ മുന്നോട്ടുകൊണ്ടുപോകാനാണ് സർക്കാർ ശ്രമിച്ചത്. എന്നാൽ സംസ്ഥാനത്തിന് അർഹമായ സഹായങ്ങൾ നൽകുന്നതിൽ കേന്ദ്രം അലംഭാവം കാട്ടുകയാണ്. സംസ്ഥാനസ‍ർക്കാർ വിദ്യാഭ്യാസം, ആരോഗ്യം എന്നീ മേഖലകളിൽ മികച്ച പുരോഗതി നേടിയിട്ടുണ്ട്. കേരളത്തിന്‍റെ മാത്രം നേട്ടങ്ങളാണത്. ഈ കാരണങ്ങൾ ചൂണ്ടിക്കാട്ടി കേന്ദ്രം കേരളത്തിന് സഹായം നിഷേധിക്കുകയാണ്. കേന്ദ്രസ‍ർക്കാർ കേരളത്തിന് കൃത്യമായ ഫണ്ടുകളോ പദ്ധതികളോ നൽകുന്നില്ല. നേട്ടങ്ങൾ കൂടുതലുണ്ട് ഫണ്ട് നഷ്ടപ്പെടാൻ കാരണമാകരുത്. കേരളത്തിന് അർഹമായ സഹായം കേന്ദ്രം നൽകണം – ഗവർണർ പറഞ്ഞു. വികസനം ഇപ്പോഴും സർക്കാരിന്‍റെ മുഖമുദ്രയാണെന്ന് ഗവർണർ പറഞ്ഞു. 41,000 കോടി രൂപയാണ് കേരളത്തിലെ അടിസ്ഥാനസൗകര്യവികസനത്തിന് മാറ്റിവച്ചിരിക്കുന്നത്. കൊല്ലം ബൈപ്പാസ്, കൊച്ചി ഇടമൺ ഇലക്ട്രിക് ലൈൻ, ജലപാതകളുടെ ഉദ്ഘാടനം എന്നിവ സ‍ർക്കാരിന്‍റെ നേട്ടമാണ്. കണ്ണൂ‍ർ വിമാനത്താവളത്തിന്‍റെ ഉദ്ഘാടനവും എടുത്തുപറയേണ്ടതാണ്. മലബാർ മേഖലയിലെ ഗതാഗതസൗകര്യങ്ങൾ മെച്ചപ്പെടുത്താൻ ഇത് സഹായകമായിട്ടുണ്ട്. ശബരിമലയിൽ വിമാനത്താവളം കൊണ്ടുവരാനുള്ള ശ്രമം തുടങ്ങി. അഴീക്കൽ തുറമുഖം യാഥാ‍ർഥ്യമാക്കാൻ പ്രത്യേക ഏജൻസിയുണ്ട്. കെഎസ്ആർടിസിയിൽ ശമ്പളവും മറ്റ് ആനുകൂല്യങ്ങളും കാലങ്ങൾക്ക് ശേഷം ജീവനക്കാർക്ക് ഉറപ്പാക്കിയെന്നും ഗവർണർ വ്യക്തമാക്കി. ബജറ്റ് ഈ മാസം 31-നാണ്. ഒൻപത് ദിവസമാണ് സമ്മേളനകാലാവധി. ലോക്സഭാ തെരഞ്ഞെടുപ്പ് അടുക്കാറായതിനാൽ വോട്ട് ഓൺ അക്കൗണ്ട് പാസ്സാക്കി സഭ പിരിയും.

പുതുവര്‍ഷ പുലരിയില്‍ ഗുരുവായൂരിൽ നാദബ്രഹ്മോത്സവം അരങ്ങേറി

ഗുരുവായൂര്‍: നാഗസ്വര കലാകാരന്മാരുടെ നേതൃത്വത്തിൽ പുതുവര്‍ഷ പുലരിയില്‍ ക്ഷേത്ര നടയിൽ നാദബ്രഹ്മോത്സവം അരങ്ങേറി . 50 ലേറെ നാഗസ്വരം-തവില്‍ കലാകാരന്‍മാര്‍ പങ്കെടുത്ത നാഗസ്വര മേളസംഗമവും, പഞ്ചരത്ന കീര്‍ത്തന വാദനവും ശ്രീകൃഷ്ണനഗരിയില്‍ ശ്രുതിമധുരമായി. രാവിലെ ക്ഷേത്രസന്നിധിയില്‍ മംഗളവാദ്യ സമര്‍പ്പണമായിരുന്നു ആദ്യം. തുടര്‍ന്ന് മേല്‍പ്പുത്തൂര്‍ ഓഡിറ്റോറിയത്തില്‍ പഞ്ചരത്ന കീര്‍ത്തനവും അരങ്ങേറി. തുറവൂര്‍ നാരായണ പണിക്കര്‍, ആറന്മുള ശ്രീകുമാര്‍, മുതുകുളം സുശീലന്‍, കാലടി രാജന്‍ തുടങ്ങിയവര്‍ നാഗസ്വരത്തിന്റെ നേതൃനിരയില്‍ അണിനിരന്നപ്പോള്‍, ആലപ്പുഴ വിജയകുമാര്‍, അനുവേണുഗോപാല്‍, മധുര ശിവരാമ ഗണേശന്‍ തുടങ്ങിയവര്‍ തവിലും നേതൃത്വം വഹിച്ച് ക്ഷേത്രതിരുമുറ്റം സംഗീതസാന്ദ്രമാക്കി. തൃപ്പുണിതത്തുറ കൃഷ്ണദാസ്, ഗുരുവായൂര്‍ ശശിമാരാര്‍, പെരിങ്ങോട് സുബ്രഹ്മണ്യന്‍ എന്നിവര്‍ ഇടയ്ക്കയിലും സ്വരരാഗലയം തീര്‍ത്ത് കണ്ണന്റെ തിരുമുറ്റം പുതുവര്‍ഷപുലരി ഉത്സവമയമാക്കി മാറ്റി. മേല്‍പ്പുത്തൂര്‍ ഓഡിറ്റോറിയത്തില്‍ കലാകാരന്മാരുടെ സദസ്സ് ചെന്നൈ സ്വദേശി വിജയകുമാറും, ധനലക്ഷ്മിയും ചേര്‍ന്ന് ഉദ്ഘാടനം ചെയ്തു. ഗുരുവായൂര്‍ ക്ഷേത്രത്തിലെ നാഗസ്വര വിദ്വാന്‍ ഗുരുവായൂര്‍ മുരളി കലാകാരന്‍മാര്‍ക്ക് ഉപഹാരം നല്‍കി

“താന്‍സന്‍” സംസ്ഥാന സ്‌കൂള്‍ കലോത്‌സവ ജേതാക്കളെ ആദരിച്ചു

ചാവക്കാട് : ചാവക്കാട് താന്‍സന്‍ സംഗീത വിദ്യാലയം ചാവക്കാടിന്റെ നേത്യത്വത്തില്‍ സംസ്ഥാന സ്‌കൂള്‍ കലോത്‌സവ ജേതാക്കളെ ആദരിച്ചു .ചാവക്കാട് നഗരസഭ ഹാളില്‍ പരിപാടി കെ വി അബ്ദുഖാദര്‍ എം എല്‍ എ ഉദ്ഘാടനം ചെയ്തു. നഗരസഭ ചെയര്‍മാന്‍ എന്‍ കെ അക്ബര്‍ അധ്യക്ഷത വഹിച്ചു. മ്യതംഗ വിദ്വാന്‍ സനേജ് ഗുരുവായൂര്‍ാ, കെ എ രമേഷ് കുമാര്‍, ജയരാജ്, ജയപാല്‍, കല ചന്ദ്രന്‍, എന്നിവര്‍ സംബന്ധിച്ചു .തുടര്‍ന്ന് സംഗീത അവതരണവും നടന്നു

ചെമ്പൈ സംഗീതോൽസവത്തിൽ ഇതുവരെ 1,400 പേർ സംഗീതാർച്ചന നടത്തി

ഗുരുവായൂർ : ചെമ്പൈ സംഗീതോത്സവത്തിൽ പ്രത്യേക കച്ചേരിയിൽ സിത്താർ മാന്ത്രികൻ അ ഷിം ചൗധരിയുടെ സിത്താർ കച്ചേരി നിറഞ്ഞ കയ്യടിയോടെ ആസ്വാദക വൃന്ദം ഏറ്റുവാങ്ങി ഞായറാഴ്ച രാത്രി 8 മുതൽ 9 വരെയാണ് സിത്താറിൽ മാസ്മരികത തീർത്തത് .രത്നശ്രീ അയ്യർ തബലയിൽ പിന്തുണ നൽകി .വൈകീട്ട് 6 മുതൽ 7 വരെ ഗായത്രി വെങ്കട്ടരാമന്റെ കച്ചേരിക്ക് മൈസൂർ ശ്രീകാന്ത് ചെന്നൈ വയലിനിലും , നാഞ്ചിൽ അരുൾ മൃദംഗത്തിലും ഹരിപ്പാട് എസ് ആർ ശേഖർ ഘടത്തിലും പക്കമേളമൊരുക്കി . തുടർന്ന് മഹാരാജപുരം എസ് ഗണേഷ് വിശ്വ നാഥന്റെ കച്ചേരിക്ക് വിവി സുരേഷ് വയലിനിലും ചേർത്തല ദിനേശ് മൃദംഗത്തിലും വിഷ്ണു വി കമ്മത്ത് ഗഞ്ചിറ യിലും പക്കമേളം തീർത്തു .ചെമ്പൈ സംഗീതോൽ സവം ആരംഭിച്ച നവംബർ 5 മുതൽ 11 വരെ 1400 ലേറെ പേർ സംഗീത മണ്ഡപത്തിൽ സംഗീതാർച്ചന നടത്തി .

ഗുരുവായൂർ ദേവസ്വത്തിന്റെ ചെമ്പൈ പുരസ്‌കാരം പാലാ സി കെ രാമചന്ദ്രന്

ഗുരുവായൂർ : ഗുരുവായൂർ ദേവസ്വ ത്തിന്റെ 2018 ലെ ചെമ്പൈ പുരസ്‌കാരത്തിന് പാലാ സി കെ രാമചന്ദ്രൻ അർഹനായി .50,000 രൂപയും സ്വർണപ്പതക്കവും ,പ്രശസ്തി പത്രവും അടങ്ങുന്നതാണ് ചെമ്പൈ പുരസ്‌കാരം .നവംബർ 4 ന് വൈകീട്ട് 6.30ന് നടക്കുന്ന ചെമ്പൈ സംഗീതോത്സവത്തിന്റെ ഉൽഘാടനത്തോടനുബന്ധിച്ച് ദേവസ്വം മന്ത്രി കടകം പള്ളി സുരേന്ദ്രൻ പുരസ്‌കാരം സമ്മാനിക്കും . കോട്ടയം ജില്ലയിലെ പാലാ മീനച്ചിൽ താലൂക്കിലെ ഇടമറ്റം ഗ്രാമത്തിൽ അധ്യാപകനായിരുന്ന കല്ലേട്ട് ജി കൃഷ്ണ പിള്ള -കാർത്യായനി ദമ്പതികളുടെ മകനായി 1943 ൽ ഒക്ടോബർ 7 ന് ജനിച്ചു ഗാനഭൂഷണം കുമരകം എം എസ് ഭാസ്കര മേനോനിൽ നിന്ന് എട്ടാം വയസിൽ സംഗീതത്തിന്റെ ബാലപാഠങ്ങൾ അഭ്യസിച്ചു പതിനാലാം വയസിൽ അരങ്ങേറ്റം നടത്തി .

ശ്രീ സ്വാതി തിരുനാൾ സംഗീത അക്കാദമിയിൽ നിന്നും ഗാനഭൂഷണം പാസായി . ഗാനപ്രവീണ പൂർത്തിയാക്കുന്നതിന് മുൻപ് അവിടെ താൽക്കാലിക അധ്യാപകനായി നിയമനം ലഭിച്ചു . പിന്നീട് ശെമ്മാകുടി ശ്രീനിവാസ അയ്യരുടെ ശിഷ്യനായി 40 വർഷത്തോളം അദ്ദേഹത്തിൻറെ കൂടെ സംഗീത സപര്യ നടത്തുകയുംചെയ്തു .ഇന്ത്യയിലെ പ്രമുഖ നഗരങ്ങളിലും , അമേരിക്ക ഇംഗ്ളണ്ട് ,കാനഡ ,ദക്ഷിണാഫ്രിക്ക ,ഗൾഫ് രാജ്യങ്ങൾ തുടങ്ങിയ സ്ഥലങ്ങളിലും സംഗീത പരിപാടികൾ നടത്തിയിട്ടുണ്ട് . 29 വർഷത്തോളം ആകാശ വാണിയിലെ സ്റ്റാഫ് ആർട്ടിസ്റ്റ് ആയിരുന്നു .മദ്രാസ് മ്യുസിക് അക്കാദമിയുടെ ടി വി സുബ്ബറാവു അവാർഡ് (1982 )എസ് രാമസ്വാമി അവാർഡ് (1983 ) എം ഡി രാമനാഥൻ അവാർഡ് (1984 )ഒളപ്പമണ്ണ ട്രസ്റ്റ് ദേവി പ്രസാദം അവാർഡ് (1995 )കേരള സംഗീത നാടക അക്കാദമി അവാർഡ് (1996 ) കേരള സംഗീത നാടക അക്കാദമി ഫെല്ലോഷിപ്( 2009), മഹാരാജ പുരം സന്താനം അവാർഡ് (2000 ) കാലിഫോർണിയ മാലിബു ഹിന്ദു ടെമ്പിൾ ആസ്ഥാന വിദ്വാൻ പദവി (2002 ) തുടങ്ങി ഒട്ടേറെ പുരസ്‌കാരങ്ങൾ ലഭിച്ചിട്ടുണ്ട് .ഭാര്യ ജയശ്രീ -ഗ്രാഫിക്സ് ,പോസ്റ്റർ മേക്കിങ് ആർട്ടിസ്റ്റായ ജയറാം ,സിനിമാ സീരിയൽ നടനായ ശ്രീറാം എന്നിവർ മക്കളാണ്