Above Pot

പരീക്ഷക്കിടെ കോപ്പിയടിച്ചതിന് പിടികൂടിയ സി ഐക്ക് സസ്പെൻഷൻ.

തിരുവനന്തപുരം : ലോ അക്കാദമി ലോ കോളജിൽ എൽഎൽ.ബി പരീക്ഷക്കിടെ കോപ്പിയടിച്ചതിന്​ സർവകലാശാല സ്ക്വാഡ് പിടികൂടിയ ഇൻസ്പെക്ടർക്ക് സസ്പെൻഷൻ. പൊലീസ് ട്രെയിനിങ്​ കോളജിലെ ലോ ഇൻസ്പെക്ടർ ആദർശിനെയാണ് സസ്പെൻഡ് ചെയ്തത്. സംഭവം പൊലീസ് ട്രെയിനിങ്​ കോളജിന്‍റെ സൽപ്പേരിന്​ കളങ്കമായെന്ന് ആദർശിനെ സസ്പെൻഡ് ചെയ്തുള്ള ഉത്തരവിൽ എ.ഡി.ജി.പി ചൂണ്ടിക്കാട്ടി. നടപടി നേരിട്ട ഉദ്യോഗസ്ഥനെ ട്രെയിനിങ്​ കോളജിൽനിന്ന്​ മാറ്റാനും നിർദേശിച്ചു.

Astrologer

കോപ്പിയടിയെക്കുറിച്ച് അന്വേഷിച്ച പൊലീസ് ​െട്രയിനിങ് കോളജ് പ്രിൻസിപ്പൽ ഡി.ജി.പിക്ക്​ സമർപ്പിച്ച റിപ്പോർട്ടിന്‍റെ അടിസ്ഥാനത്തിലാണ്​ നടപടി. സേനാംഗത്തിന്​ ചേരാത്ത പ്രവൃത്തി ആദർശിന്‍റെ ഭാഗത്തുനിന്ന്​ ഉണ്ടായെന്നായിരുന്നു റിപ്പോർട്ടിലെ പരാമർശം. ​എൽഎൽ.ബി വിദ്യാർഥിയായിരുന്ന ആദർശ്​ പൊലീസ്​ ട്രെയിനികൾക്ക്​ നിയമം സംബന്ധിച്ച ക്ലാസ്​ എടുത്തതും വിവാദമായിരുന്നു. എൽഎൽ.ബി പബ്ലിക് ഇന്‍റർനാഷനൽ ലോ പേപ്പറിന്‍റെ പരീക്ഷക്ക്​ കോപ്പിയടിച്ചതിന് സർവകലാശാല സ്ക്വാഡ് ദിവസങ്ങൾക്ക്​ മുമ്പാണ്​​ ആദർശിനെ പിടികൂടിയത്.

സംഭവം വിവാദമായതിനെ തുടർന്ന്​ അന്വേഷിച്ച് റിപ്പോർട്ട് നൽകാൻ പൊലീസ് ​െട്രയിനിങ് കോളജ് പ്രിൻസിപ്പൽ കെ.എൽ. ജോൺകുട്ടിയെ ഡി.ജി.പി അനിൽകാന്ത്​ ചുമതലപ്പെടുത്തി. അതിന്‍റെ അടിസ്ഥാനത്തിൽ വിശദാംശങ്ങൾ ലഭ്യമാക്കണമെന്നാവശ്യപ്പെട്ട് കേരള സർവകലാശാല പരീക്ഷ കൺട്രോളർ, ലോ അക്കാദമി ലോ കോളജ് പ്രിൻസിപ്പൽ എന്നിവർക്ക് പൊലീസ് ​െട്രയിനിങ് കോളജ് പ്രിൻസിപ്പൽ കത്ത്​ നൽകി. കോപ്പിയടിച്ചതിന്​ പരിശോധകസംഘം ആദർശിനെ പിടികൂടിയതായി സർവകലാശാലയും കോളജ് അധികൃതരും മറുപടി നൽകി. അതിന്‍റെ അടിസ്ഥാനത്തിൽ കോപ്പിയടി സ്ഥിരീകരിച്ച്​ പി.ടി.സി പ്രിൻസിപ്പൽ റിപ്പോർട്ട്​ സമർപ്പിച്ചു. കോപ്പിയടിച്ചതിന് ആദർശ് ഉൾപ്പെടെ നാലുപേരെയാണ് സർവകലാശാല സ്ക്വാഡ് പിടികൂടിയത്. ലോ അക്കാദമിയിലെ ഈവനിങ്​ ബാച്ചിൽ പഠിക്കുന്നതിലേറെയും സർക്കാർ ഉദ്യോഗസ്ഥരാണ്. കോപ്പിയടിക്ക് പിടിക്കപ്പെട്ട മറ്റുള്ളവരും സർക്കാർ ഉദ്യോഗസ്ഥരാകാൻ സാധ്യതയുള്ളതിലാണ് വിവരം രഹസ്യമായി സൂക്ഷിക്കുന്നതെന്നാണ് സൂചന. എന്നാൽ പിടിയിലായ രണ്ടുപേർ റെഗുലർ വിദ്യാർഥികളാണെന്ന സൂചനയുമുണ്ട്

​2015ല്‍ തൃശൂര്‍ റേഞ്ച് ഐ.ജിയായിരുന്ന ടി.ജെ.ജോസിനെ എം.ജി സര്‍വകലാശാലയുടെ എല്‍.എല്‍.ബി പരീക്ഷയില്‍ കോപ്പിയടിച്ചതിന് പിടികൂടിയിരുന്നു. വകുപ്പുതല അന്വേഷണത്തിനുശേഷം ക്രമസമാധാന ചുമതലയില്‍ ഒഴിവാക്കി. ഒരു വര്‍ഷത്തേക്ക് എം.ജി സര്‍വകലാശാല പരീക്ഷകളില്‍ നിന്നും ജോസിനെ വിലക്കിയിരുന്നു

Vadasheri Footer