സംസ്ഥാനത്ത് കാലവർഷം നാളെ എത്തും ,ഞായറാഴ്ച മുതൽ ശക്തമായ മഴ
തിരുവനന്തപുരം: സംസ്ഥാനത്ത് കാലവര്ഷം നാളെ എത്തും. മറ്റന്നാള് മുതല് കേരളത്തില് ശക്തമായ മഴയുണ്ടാകുമെന്നാണ് ലഭിക്കുന്ന വിവരം. അടുത്തയാഴ്ച മൂന്ന് ദിവസങ്ങളില് റെഡ്, ഓറഞ്ച് അലേര്ട്ട് പ്രഖ്യാപിച്ചിട്ടുണ്ട്. വിവിധ ജില്ലകളിലാണ് അലേര്ട്ടുകള് പ്രഖ്യാപിച്ചിരിക്കുന്നത്.
അറബിക്കടലില് രൂപപ്പെടുന്ന ന്യൂനമര്ദ്ദം ഞായറാഴ്ചയോടെ ശക്തി പ്രാപിക്കുമെന്നും ഇത് കേരള – കര്ണ്ണാടക തീരത്ത് വടക്ക് പടിഞ്ഞാറന് ദിശയില് നീങ്ങുമെന്നാണ് കാലാവസ്ഥാ നിരീക്ഷണ കേന്ദ്രം നല്കുന്ന മുന്നറിയിപ്പ്. ജൂണ് 10 ന് തൃശ്ശൂര് ജില്ലയിലും, ജൂണ് 11 ന് എറണാകുളം, മലപ്പുറം, കോഴിക്കോട് എന്നീ ജില്ലകളിലുമാണ് കേന്ദ്ര കാലാവസ്ഥ നിരീക്ഷണ കേന്ദ്രം ‘റെഡ്’ അലര്ട്ട് പ്രഖ്യാപിച്ചത്.
റെഡ് പ്രഖ്യാപിക്കപ്പെട്ട ജില്ലകളില് ഒറ്റപ്പെട്ടയിടങ്ങളില് അതിശക്തമായ മഴയ്ക്കുള്ള സാധ്യതയാണ് പ്രവചിച്ചിരിക്കുന്നത്. ജൂണ് 7 ന് തിരുവനന്തപുരം, കൊല്ലം, ആലപ്പുഴ, കോട്ടയം, എറണാകുളം എന്നീ ജില്ലകളിലും, ജൂണ് 8 ന് തിരുവനന്തപുരം, കൊല്ലം, ആലപ്പുഴ, എറണാകുളം, തൃശ്ശൂര് എന്നീ ജില്ലകളിലും, ജൂണ് 9 ന് പത്തനംതിട്ട, കോട്ടയം, ഇടുക്കി, പാലക്കാട്, മലപ്പുറം, കോഴിക്കോട് എന്നീ ജില്ലകളിലും, ജൂണ് 10 ന് കോട്ടയം, ഇടുക്കി, പാലക്കാട് എന്നീ ജില്ലകളില് ജൂണ് 11 ന് വയനാട് ജില്ലയിലും യെല്ലോ അലേര്ട്ടും പ്രഖ്യാപിച്ചു.
റെഡ്, ഓറഞ്ച്, യെല്ലോ അലേര്ട്ടുകള് പ്രഖ്യാപിച്ച ജില്ലകളില് പ്രളയ സാധ്യതയുള്ള പ്രദേശങ്ങളില് താമസിക്കുന്നവരും 2018 ലെ പ്രളയത്തില് വെള്ളം കയറിയ പ്രദേശങ്ങളില് താമസിക്കുന്നവരും അടച്ചുറപ്പില്ലാത്ത വീടുകളില് താമസിക്കുന്നവരും പ്രധാനപ്പെട്ട രേഖകളും വിലപ്പെട്ട വസ്തുക്കളും ഉള്പ്പെടുന്ന ഒരു എമര്ജന്സി കിറ്റ് തയ്യാറാക്കി വെക്കുകയും മാറി താമസിക്കേണ്ട സാഹചര്യം വരികയാണെങ്കില് അധികൃതര് നിര്ദേശിക്കുന്ന സുരക്ഷിത സ്ഥാനത്തേക്ക് മാറിത്താമസിക്കാന് തയ്യാറാവുകയും വേണമെന്നാണ് നല്കുന്ന മുന്നറിയിപ്പ്. ഉരുള്പൊട്ടല് സാധ്യതയുള്ള പ്രദേശങ്ങളില് താമസിക്കുന്നവരും 2018 ല് ഉരുള്പൊട്ടലുണ്ടായ ഇടങ്ങളില് താമസിക്കുന്നവരും ജാഗ്രത പാലിക്കണമെന്നും നിര്ദേശമുണ്ട്.
