കെ.എം.ആര്.എല്. മാനേജിംഗ് ഡയറക്ടര് മുഹമ്മദ് ഹനീഷിനെ തല്സ്ഥാനത്തുനിന്ന് മാറ്റി.
തിരുവനന്തപുരം: പാലാരിവട്ടം മേല്പ്പാല വിവാദത്തെ തുടര്ന്ന് കെ.എം.ആര്.എല്. മാനേജിംഗ് ഡയറക്ടര് മുഹമ്മദ് ഹനീഷിനെ തല്സ്ഥാനത്തുനിന്ന് മാറ്റി. ഹനീഷിനെ വ്യവസായ വകുപ്പ് (പി.എസ്.യു) സെക്രട്ടറിയായി മാറ്റി നിയമിക്കാന് ഇന്ന് ചേര്ന്ന മന്ത്രിഭ യോഗം തീരുമാനിച്ചു.
സാംസ്കാരിക വകുപ്പ് സെക്രട്ടറി റാണി ജോര്ജിന് നിലവിലുള്ള ചുമതലകള്ക്കു പുറമെ കേരള സ്റ്റേറ്റ് കോ-ഓപ്പറേറ്റീവ് ബാങ്ക് മനേജിംഗ് ഡയറക്ടറുടെ ചുമതല കൂടി നല്കും. പൊതുവിദ്യാഭ്യാസ സെക്രട്ടറി എ. ഷാജഹാന് നിലവിലുള്ള ചുമതലകള്ക്കു പുറമെ സൈനിക ക്ഷേമ വകുപ്പ്, പ്രിന്റിംഗ് ആന്റ് സ്റ്റേഷനറി എന്നിവയുടെ ചുമതല കൂടി നല്കും.
എറണാകുളം കലക്ടര് മുഹമ്മദ് സഫീറുള്ളയെ എസ്.ജി.എസ്.ടി വകുപ്പ് അഡീഷണല് കമ്മീഷണറായി മാറ്റി നിയമിക്കും. വിവരസാങ്കേതിക വിദ്യാ വകുപ്പ് ജോയിന്റ് സെക്രട്ടറിയുടെ അധിക ചുമതലയും അദ്ദേഹം വഹിക്കും. കണ്ണൂര് ജില്ലാ കലക്ടര് മീര് മുഹമ്മദ് അലിയെ ശുചിത്വമിഷന് ഡയറക്ടറായി മാറ്റി നിയമിക്കാനും തീരുമാനിച്ചു.
മലപ്പുറം ജില്ലാ കലക്ടര് അമിത് മീണയെ അനര്ട്ട് ഡയറക്ടറായും അസാപ് ചീഫ് എക്സിക്യൂട്ടീവ് ഓഫീസര് അദീല അബ്ദുള്ളയെ ആലപ്പുഴ ജില്ലാ കലക്ടറായും മാറ്റി നിയമിക്കാന് തീരുമാനിച്ചു.
ആലപ്പുഴ ജില്ലാ കലക്ടര് എസ്. സുഹാസിനെ എറണാകുളം ജില്ലാ കലക്ടറായും ഹൗസിംഗ് കമ്മീഷണര് ബി. അബ്ദുള് നാസറിനെ കൊല്ലം ജില്ലാ കലക്ടറായും മാറ്റി നിയമിക്കും. സാമൂഹ്യനീതി വകുപ്പ് ഡയറക്ടര് ജാഫര് മാലിക്കിനെ മലപ്പുറം ജില്ലാ കലക്ടറായും പൊതുഭരണ ഡെപ്യൂട്ടി സെക്രട്ടറി കെ. ഗോപാലകൃഷ്ണനെ തിരുവനന്തപുരം ജില്ലാ കലക്ടറായും നിയമിക്കും. ഐ ആന്റ് പി.ആര്.ഡി. ഡയറക്ടര് ടി.വി. സുഭാഷിനെ കണ്ണൂര് ജില്ലാ കലക്ടറായും നിയമിച്ചു.