ഹെൽത്ത് കെയർ ക്ലബിന്റെ സൗജന്യ ഉച്ചഭക്ഷണ പദ്ധതി ജനുവരി ഒന്ന് മുതൽ
ഗുരുവായൂര്‍: ആരോഗ്യ-ജീവകാരുണ്യ സംഘടനയായ ഹെല്‍ത്ത് കെയര്‍ ക്ലബ്ബ്, ജനുവരി ഒന്നുമുതല്‍ സൗജന്യ ഉച്ച ഭക്ഷണ പദ്ധതി ആരംഭിയ്ക്കുമെന്ന് സംഘടന ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ഉച്ചയ്‌ക്കൊരുപൊതി ചോര്‍ എന്ന പേരിലാണ് പദ്ധതി ആരംഭിയ്ക്കുന്നത്.
നഗരസഭ അനുവദിച്ചുതരുന്ന സ്ഥലത്ത് സ്ഥാപിയ്ക്കുന്ന ലഞ്ച് ബോക്‌സില്‍നിന്ന് ആവശ്യക്കാര്‍ക്ക് ഭക്ഷണം എടുക്കാവുന്ന തരത്തിലാണ് ക്രമീകരണം ഒരുക്കുന്നതെന്നും ഭാരവാഹികളായ ആര്‍. ജയകുമാര്‍, എം.എ. ആസിഫ്, പി. മുരളീധരന്‍, പി.എം. ഷംസുദീന്‍, ഡോ: ഹരിഭാസ്‌ക്കര്‍, പി. സുനില്‍കുമാര്‍ എന്നിവര്‍ അറിയിച്ചു. ആദ്യ ഘട്ടത്തില്‍ അമ്പതോളം പേര്‍ക്കാണ് ഉച്ച ഭക്ഷണം നല്‍കാന്‍ ഉദ്ദേശിച്ചിട്ടുള്ളത്.
ക്ലബ്ബിന്റെ കാരുണ്യ പ്രവര്‍ത്തിയിലെ പ്രധാന പദ്ധതിയാണ് ഉച്ചയ്‌ക്കൊരു പൊതിചോറിന് തുടക്കം കുറിയ്ക്കുന്നത്. ക്ലബ്ബിലെ അംഗങ്ങളില്‍ നിന്നും സ്വരൂപിയ്ക്കുന്ന തുക ഉപയോഗിച്ചാണ് പദ്ധതി നടപ്പിലാക്കുന്നതെന്നും ഭാരവാഹികള്‍ അറിയിച്ചു