മിസൈൽ ആക്രമണം യു എ ഇ തടഞ്ഞത് ഇസ്രായേലിന്റെ അയൺ ഡോം ഉപയോഗിച്ച്

ദുബൈ : യുണൈറ്റഡ് അറബ് എമിറേറ്റ്സിന് (യു.എ.ഇ) നേരെ ഇറാന്റെ ഭാഗത്തുനിന്നുണ്ടായ മിസൈൽ ആക്രമണം തടയാൻ ഇസ്രായേലിന്റെ വ്യോമ പ്രതിരോധ സംവിധാനം ഉപയോഗിച്ചതായി സി.എൻ.എൻ റിപ്പോർട്ട് ചെയ്തു. ഈ വിഷയവുമായി അടുത്ത ബന്ധമുള്ള വൃത്തങ്ങളെ ഉദ്ധരിച്ചാണ് സി.എൻ.എൻ ഈ വാർത്ത പുറത്തുവിട്ടത്. യു.എ.ഇ ലക്ഷ്യമാക്കി വന്ന ഇറാനിയൻ മിസൈലുകൾ വിജയകരമായി തടയുന്നതിൽ ഈ പ്രതിരോധ സംവിധാനം നിർണായക പങ്കുവഹിച്ചതായാണ് അന്താരാഷ്ട്ര റിപ്പോർട്ടുകൾ വ്യക്തമാക്കുന്നത്.

ഇറാനുമായുള്ള സംഘർഷങ്ങളുടെ തുടക്കത്തിൽ തന്നെ ഇസ്രായേൽ തങ്ങളുടെ പ്രശസ്തമായ ‘അയൺ ഡോം’ (Iron Dome) വ്യോമ പ്രതിരോധ സംവിധാനവും ഇത് പ്രവർത്തിപ്പിക്കാൻ പരിശീലനം ലഭിച്ച സൈനികരെയും യു.എ.ഇയിൽ രഹസ്യമായി വിന്യസിച്ചിരുന്നതായി വാർത്താ ഏജൻസികൾ സൂചിപ്പിക്കുന്നു. കഴിഞ്ഞ ദിവസം യു.എ.ഇയിലെ ഫുജൈറയിലുള്ള പ്രധാന എണ്ണ സംഭരണ കേന്ദ്രത്തിന് നേരെ ഇറാൻ ഡ്രോൺ ആക്രമണം നടത്തുകയും തീപിടിത്തം ഉണ്ടാകുകയും ചെയ്തിരുന്നു. ഇതിന് പിന്നാലെയാണ് കൂടുതൽ മിസൈലുകളും ഡ്രോണുകളും ഉപയോഗിച്ച് യു.എ.ഇയിലെ വിവിധ മേഖലകളെ ലക്ഷ്യം വെച്ചുള്ള ഇറാന്റെ പുതിയ നീക്കങ്ങളും, അതിനെ നേരിടാൻ ഇസ്രായേൽ സാങ്കേതികവിദ്യ ഉപയോഗിച്ചതുമായി ബന്ധപ്പെട്ട വിവരങ്ങളും പുറത്തുവരുന്നത്.

ഹോർമുസ് കടലിടുക്കിൽ വാണിജ്യ കപ്പലുകൾക്ക് സുരക്ഷയൊരുക്കാൻ അമേരിക്കൻ സൈന്യം പ്രഖ്യാപിച്ച ‘പ്രോജക്ട് ഫ്രീഡം’ (Project Freedom) ദൗത്യവും ഇറാനുമായുള്ള ഏറ്റുമുട്ടലുകളും മേഖലയിൽ വലിയ യുദ്ധഭീതി സൃഷ്ടിച്ചിരിക്കുന്ന സാഹചര്യത്തിലാണ് ഈ പുതിയ സംഭവവികാസങ്ങൾ. ഇറാന്റെ ഭീഷണികളെ നേരിടാൻ ഒരു അറബ് രാജ്യം ഇസ്രായേലിന്റെ സൈനിക സംവിധാനങ്ങളെ നേരിട്ട് ആശ്രയിക്കുന്നത് പശ്ചിമേഷ്യൻ നയതന്ത്ര-രാഷ്ട്രീയ സമവാക്യങ്ങളിൽ ഉണ്ടാകാൻ പോകുന്ന വലിയ മാറ്റങ്ങളുടെ സൂചനയായാണ് വിലയിരുത്തപ്പെടുന്നത്.

അതെ സമയം ഹോർമുസ് കടലിടുക്കിലൂടെ കടന്നുപോവുകയായിരുന്ന രണ്ട് അമേരിക്കൻ നാവികസേനാ യുദ്ധക്കപ്പലുകൾക്ക് നേരെ ഇറാന്റെ വൻ ആക്രമണം. യു.എസ്.എസ് ട്രക്സ്റ്റൺ (USS Truxtun), യു.എസ്.എസ് മേസൺ (USS Mason) എന്നീ ഗൈഡഡ്-മിസൈൽ ഡിസ്ട്രോയർ കപ്പലുകളെ ലക്ഷ്യമാക്കി ഇറാൻ സൈന്യം സായുധ ബോട്ടുകളും ഡ്രോണുകളും മിസൈലുകളും ഉപയോഗിച്ച് ആക്രമണം നടത്തിയതായി സി.ബി.എസ് ന്യൂസ് ഉൾപ്പെടെയുള്ള മാധ്യമങ്ങൾ റിപ്പോർട്ട് ചെയ്തു. എന്നാൽ, കനത്ത ആക്രമണങ്ങളെ അതിജീവിച്ച് ഈ രണ്ട് കപ്പലുകളും സുരക്ഷിതമായി പേർഷ്യൻ ഗൾഫിൽ പ്രവേശിച്ചതായാണ് അമേരിക്കൻ പ്രതിരോധ കേന്ദ്രങ്ങൾ നൽകുന്ന വിശദീകരണം.
യു.എസ് സൈന്യത്തിന്റെ അപ്പാച്ചെ ഹെലികോപ്റ്ററുകളുടെയും മറ്റ് വ്യോമസേനാ വിമാനങ്ങളുടെയും ശക്തമായ പിന്തുണയോടെയാണ് നാവികസേനാ കപ്പലുകൾ ഈ കടലിടുക്ക് പിന്നിട്ടത്.

കപ്പലുകളെ ലക്ഷ്യമാക്കി വന്ന എല്ലാ മിസൈലുകളും ഡ്രോണുകളും അമേരിക്കൻ പ്രതിരോധ സംവിധാനങ്ങൾ വിജയകരമായി തടഞ്ഞുവെന്നും, കപ്പലുകൾക്ക് യാതൊരുവിധ കേടുപാടുകളും സംഭവിച്ചിട്ടില്ലെന്നും യു.എസ് സെൻട്രൽ കമാൻഡ് (CENTCOM) അറിയിച്ചു. സമുദ്രപാതയിൽ തടസ്സം സൃഷ്ടിക്കാനും ആക്രമണം നടത്താനും ശ്രമിച്ച ആറ് ഇറാനിയൻ സായുധ ബോട്ടുകൾ അമേരിക്കൻ സൈന്യം ഹെലികോപ്റ്ററുകളുടെ സഹായത്തോടെ തകർത്തതായും റിപ്പോർട്ടുകളുണ്ട്.

ഹോർമുസ് കടലിടുക്കിലൂടെയുള്ള വാണിജ്യ കപ്പലുകളുടെ സുഗമമായ യാത്ര ഉറപ്പാക്കുന്നതിനായി അമേരിക്ക അടുത്തിടെ പ്രഖ്യാപിച്ച ‘പ്രോജക്ട് ഫ്രീഡം’ (Project Freedom) ദൗത്യത്തിന്റെ ഭാഗമായാണ് ഈ യു.എസ് കപ്പലുകൾ മേഖലയിലൂടെ സഞ്ചരിച്ചത്. വാണിജ്യ കപ്പലുകൾക്കും മറ്റും സുരക്ഷാ കവചമൊരുക്കുക എന്നതാണ് അമേരിക്ക ഇതിലൂടെ ലക്ഷ്യമിടുന്നത്. ഹോർമുസ് കടലിടുക്കിന്റെ നിയന്ത്രണം തങ്ങൾക്കാണെന്നും മേഖലയിലെ അമേരിക്കൻ സൈനിക ഇടപെടലുകളെ ശക്തമായി നേരിടുമെന്നും ഇറാൻ മുന്നറിയിപ്പ് നൽകിയിട്ടുണ്ട്. ഈ സംഭവവികാസങ്ങൾ പശ്ചിമേഷ്യയിൽ വീണ്ടും യുദ്ധഭീതിക്കും കടുത്ത നയതന്ത്ര പ്രതിസന്ധികൾക്കും വഴിവെച്ചിരിക്കുകയാണ്.