സേവ് ഇന്ത്യ അസംബ്ലി ഗുരുവായൂരിൽ

ഗുരുവായൂർ : ലോകത്തിന് മുന്നിൽ ഇന്ത്യക്കുള്ള സ്വീകാര്യത അതിൻ്റെ മതനിരപേക്ഷ ജനാധിപത്യ സ്വഭാവമാണെന്നും അത് നഷ്ടപ്പെടുന്നത് രാജ്യത്തിൻ്റെ അസ്ഥിത്വത്തെ തന്നെ ഇല്ലാതാക്കുമെന്നും സി പി ഐ സംസ്ഥാന എക്സിക്യുട്ടീവ് അംഗം മുല്ലക്കര രത്നാകരൻ. വീണ്ടെടുക്കുക മതേതര ഇന്ത്യയെ എന്ന മുദ്രാവാക്യം ഉയർത്തി സ്വാതന്ത്ര്യ ദിനത്തിൽ എഐവൈഎഫ് സംഘടിപ്പിച്ച സേവ് ഇന്ത്യ അസംബ്ലി ഗുരുവായൂരിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

പടിഞ്ഞാറെ നടയിലെ പി കൃഷ്ണപിള്ള സ്ക്വയറിൽ നടന്ന പരിപാടിയിൽ എ ഐ വൈ എഫ് ജില്ലാ സെക്രട്ടറി ബിനോയ് ഷെബീർ അധ്യക്ഷനായിരുന്നു. സിപിഐ ജില്ലാ സെക്രട്ടറി കെ കെ വൽസരാജ്, സംസ്ഥാന കൗൺസിൽ അംഗം വി എസ് സുനിൽകുമാർ, എ ഐ വൈ എഫ് സംസ്ഥാന പ്രസിഡണ്ട് പ്രസാദ് പാറേരി, സിപിഐ ജില്ലാ എക്സി. അംഗങ്ങളായ പി കെ സുബ്രഹ്മണ്യൻ, വി കെ കൃഷ്ണൻ, ജില്ലാ കമ്മിറ്റി അംഗങ്ങളായ ഗീത ഗോപി, സി വി ശ്രീനിവാസൻ, മണ്ഡലം സെക്രട്ടറി അഡ്വക്കേറ്റ് പി മുഹമ്മദ് ബഷീർ, എ ഐ വൈ എഫ് സംസ്ഥാന കമ്മിറ്റി അംഗങ്ങളായ കനിഷ്കൻ വെല്ലൂർ, ടി പി സുനിൽ, വി കെ വിനീഷ്, മണ്ഡലം സെക്രട്ടറി പ്രസിഡൻറ് എം എ സന്തോഷ്, സെക്രട്ടറി പി കെ സേവിയർ തുടങ്ങിയവർ സംസാരിച്ചു.