ഗുരുവായൂരിൽ നിന്നുള്ള പാസഞ്ചർ തീവണ്ടികൾ പുന:സ്ഥാപിക്കണം: ഗുരുവായൂർ ദേവസ്വം ഭരണസമിതി.

ഗുരുവായൂർ : കൊവിഡ് പശ്ചാത്തലത്തിൽ നിർത്തിവെച്ച ഗുരുവായൂരിൽ നിന്നുള്ള പാസഞ്ചർ തീവണ്ടികളുടെ സർവ്വീസ് പുനരാരംഭിക്കണമെന്ന് ഗുരുവായൂർ ദേവസ്വം ഭരണസമിതി യോഗം ആവശ്യപ്പെട്ടു. തീവണ്ടി സർവ്വീസ് പുന:സ്ഥാപിക്കണമെന്ന് റെയിൽവേ അധികാരികളോട് അഭ്യർത്ഥിക്കാനും ഇന്നു ചേർന്ന ഭരണ സമിതി യോഗം തീരുമാനിച്ചു.
കൊവിഡ് നിയന്ത്രണങ്ങളിൽ ഇളവ് ലഭ്യമായ സാഹചര്യത്തിൽ ഗുരുവായൂരിലേക്ക് കൂടുതൽ ഭക്തജനങ്ങൾ എത്തിക്കൊണ്ടിരിക്കുകയാണ്.ഇവർക്കാവശ്യമായ യാത്രാ സൗകര്യങ്ങൾ ഒരുക്കുന്നതിൽ റെയിൽവേയുടെ സഹകരണം അനിവാര്യമാണെന്നും യോഗം വിലയിരുത്തി.

ഏപ്രിൽ 15 ന് പുലർച്ചെ 2:30 മണി മുതൽ 3:30 വരെ വിഷുക്കണി ദർശനത്തിനായി തുടർ നടപടി സ്വീകരിക്കാനും യോഗത്തിൽ തീരുമാനമായി. ദേവസ്വം ഭരണസമിതി യോഗത്തിൽ ചെയർമാൻ ഡോ.വി.കെ.വിജയൻ അധ്യക്ഷനായിരുന്നു. ഭരണ സമിതി അംഗങ്ങളായ മല്ലിശ്ശേരി പരമേശ്വരൻ നമ്പൂതിരിപ്പാട്, തന്ത്രി പി.സി.ദിനേശൻ നമ്പൂതിരിപ്പാട്, ചെങ്ങറ സുരേന്ദ്രൻ , അഡ്വ.കെ.വി.മോഹന കൃഷ്ണൻ, ദേവസ്വം അഡ്മിനിസ്ട്രേറ്റർ കെ.പി.വിനയൻ എന്നിവർ പങ്കെടുത്തു