വൈകുണ്ഠ ഏകാദശി, ഗുരുവായൂരിൽ അഭൂത പൂര്വ്വമായ ഭക്തജനതിരക്ക് അനുഭവപ്പെട്ടു
ഗുരുവായൂര്: ഗുരുവായൂര് ക്ഷേത്രത്തില്, വൈകുണ്ഠ ഏകാദശി ദിനമായ വ്യാഴാഴ്ച അഭൂത പൂര്വ്വമായ ഭക്തജനതിരക്ക് അനുഭവപ്പെട്ടു . രാവിലെ നിര്മ്മാല്ല്യ ദര്ശനം മുതല് രാത്രി അത്താഴപൂജ കഴിയുവോളം ക്ഷേത്രത്തിലേയ്ക്ക് ഭക്തരുടെ ഒഴുക്കായിരുന്നു, രാവിലേയും, ഉച്ചയ്ക്കും ക്ഷേത്രത്തില് ദേവസ്വം ആനതറവാട്ടിലെ കൊമ്പന് ഇന്ദ്രസെന് ഭഗവാന്റെ തങ്കതിടമ്പേറ്റിയുള്ള കാഴ്ച്ചശീവേലിയ്ക്ക്, പെരുവനം കുട്ടനന്മാരാരുടെ നേതൃത്വത്തിലുള്ള പഞ്ചാരിമേളം അകമ്പടിയായി.
ഗുരുവായൂര് ബ്രഹ്മണ സമൂഹത്തിന്റെ വകയായി സമ്പൂര്ണ്ണ നെയ്യ്വിളക്കാഘോഷവും നടന്നു. രാത്രി ഇടയ്ക്കാനാദസ്വരത്തോടുള്ള വിളക്കെഴുന്നെള്ളിപ്പില് നെയ്യ് വിളക്കിന്റെ നിറശോഭയിലായിരുന്നു, ഗുരുവായൂരപ്പന്റെ അകത്തളം തെളിഞ്ഞുനിന്നത്. സന്ധ്യയ്ക്ക് ദീപസ്തംഭങ്ങളും, നടപുരദീപങ്ങളും തെളിഞ്ഞതോടെ ക്ഷേത്രാങ്കണം തികച്ചും ഉത്സവ പ്രതീതിയിലായി.