കേരളത്തിന്റെ അന്താരാഷ്ട്ര തിരയുത്സവത്തിന് പ്രൗഢ തുടക്കം

തിരുവനന്തപുരം: കേരളത്തിന്റെ അന്താരാഷ്ട്ര തിരയുത്സവത്തിന് അനന്തപുരിയിൽ പ്രൗഢഗംഭീര തുടക്കം.

30-ാമത് അന്താരാഷ്ട്ര ചലച്ചിത്രമേളയുടെ ഉദ്ഘാടനം തിരുവനന്തപുരം നിശാഗന്ധിയിൽ സാംസ്കാരിക വകുപ്പ് മന്ത്രി സജി ചെറിയാൻ ഔദ്യോഗികമായി നിർവഹിച്ചു.

30 വയസ് തികയുന്ന മേളയുടെ ഉദ്ഘാടന വേദിയിൽ 30 ദീപങ്ങൾ തെളിയിച്ചു.
കേരളത്തിൻ്റെ കലാ സാംസ്കാരിക രംഗത്തെ ഏറ്റവും മികച്ചതാക്കാൻ ചലച്ചിത്രമേളയ്ക്ക് കഴിഞ്ഞിട്ടുണ്ടെന്ന് ഉദ്ഘാടന പ്രസംഗത്തിൽ മന്ത്രി ചൂണ്ടിക്കാട്ടി.

കേരള ചലച്ചിത്ര അക്കാദമി വൈസ് ചെയർപേഴ്സൺ കുക്കു പരമേശ്വരൻ അധ്യക്ഷത വഹിച്ച ചടങ്ങിൽ ചിലിയൻ സംവിധായകൻ പാബ്ലോ ലോറെയ്ൻ മുഖ്യാതിഥിയായി.

‘സ്പിരിറ്റ് ഓഫ് സിനിമ’ അവാർഡ് ജേതാവായ കനേഡിയൻ സംവിധായിക കെല്ലി ഫൈഫ് മാർഷലിനെ സാംസ്കാരിക വകുപ്പ് മന്ത്രി അവാർഡ് നൽകി ആദരിച്ചു.

പലസ്തീൻ അംബാസിഡർ അബ്‌ദുള്ള എം അബു ഷവേഷ്, ജർമൻ അംബാസിഡർ ഡോ. ഫിലിപ്പ് അക്കർമാൻ എന്നിവർക്കും ആദരം നൽകി. പലസ്‌തീൻ അംബാസിഡറുടെ കൈകൾ ഉയർത്തിപ്പിടിച്ച മന്ത്രി സജി ചെറിയാന്റെ പ്രവൃത്തി പലസ്തീൻ ജനതയോടുള്ള കേരളത്തിന്റെ ഐക്യദാർഢ്യത്തിന്റെ പ്രകടനമായി.

ചലച്ചിത്ര രംഗത്തെ 50 വർഷത്തെ സംഭാവനയ്ക്ക് പ്രമുഖ സംവിധായകൻ ആർ രാജീവ് നാഥിനെ വേദിയിൽ ആദരിച്ചു. അദ്ദേഹത്തോടുള്ള ആദരമായി ചലച്ചിത്ര അക്കാദമി പ്രസിദ്ധീകരിച്ച ‘തണൽ’ പുസ്തകം അക്കാദമി മുൻ ചെയർമാൻ ടി കെ രാജീവ് കുമാറിൽ നിന്നും കെഎസ്എഫ്ഡിസി ചെയർമാൻ കെ മധു ഏറ്റുവാങ്ങി.

ചലച്ചിത്രമേള കൈപുസ്തകം സ്പാനിഷ് നടിയും ജൂറി അംഗവുമായ
ആഞ്ജല മൊളീന മുൻ ചീഫ് സെക്രട്ടറി കെ ജയകുമാറിന് നൽകി പ്രകാശനം ചെയ്തു. വിയറ്റ്‌നാമിൽ നിന്നുള്ള ചലച്ചിത്രപ്രവർത്തകനും ജൂറി അംഗവുമായ ബുയി താക് ചുയെന് ചടങ്ങിൽ ആദരമേകി.
ഡെയിലി ബുള്ളറ്റിൻ്റെ പ്രകാശനം വിഖ്യാത സംവിധായകൻ അടൂർ ഗോപാലകൃഷ്ണൻ സംസ്കാരിക വകുപ്പ് ഡയറക്ടർ ഡോ. ദിവ്യ എസ് അയ്യർക്ക് നൽകി നിർവഹിച്ചു. ചലച്ചിത്ര സമീക്ഷയുടെ പ്രത്യേക പതിപ്പ് സംവിധായകൻ കമൽ, ബീന പോളിന് നൽകി പ്രകാശനം ചെയ്തു.

ഇൻഫർമേഷൻ പബ്ലിക്‌ റിലേഷൻസ് വകുപ്പിന്റെ പ്രസിദ്ധീകരണങ്ങളായ ജനപഥത്തിൻ്റെയും കേരള കോളിങ്ങിൻ്റെയും ചലച്ചിത്രമേള പ്രത്യേക പതിപ്പ് സംസ്ഥാന സാംസ്കാരിക പ്രവർത്തക ക്ഷേമനിധി ബോർഡ് ചെയർപേഴ്സൺ മധുപാലിനു നൽകി മന്ത്രി പ്രകാശനം ചെയ്തു.

ചീഫ് സെക്രട്ടറി ഡോ. എ ജയതിലക്, ചലച്ചിത്ര അക്കാദമി സെക്രട്ടറി സി അജോയ്, മുൻ വൈസ് ചെയർമാൻ പ്രേം കുമാർ, ജനറൽ കൗൺസിൽ അംഗം സോഹൻ സീനുലാൽ ഫിലിം ചേമ്പർ പ്രസിഡൻ്റ് അനിൽ തോമസ്, നടി സരയു മോഹൻ തുടങ്ങിയവർ പങ്കെടുത്തു.
ഉദ്ഘാടന ചടങ്ങിന് ശേഷം ആൻ മേരി ജാസിർ സംവിധാനം ചെയ്ത “പലസ്തീൻ 36” നിശാഗന്ധിയിൽ പ്രദർശിപ്പിച്ചു.