ഗുരുവായൂരിൽ കുടിവെള്ളം നൽകാൻ തെക്കേനട പന്തലിൽ ആർ ഒ പ്ലാൻ്റ്

ഗുരുവായൂർ : ശ്രീഗുരുവായൂരപ്പ ദർശനത്തിനായി കാത്തിരിക്കുന്ന ഭക്തർക്ക് ചൂടും തണുപ്പും ഒപ്പം സാദാ നിലയിലുള്ള ശുദ്ധീകരിച്ച കുടിവെള്ളവും ലഭ്യമാക്കുന്ന സംഭരണി’ ക്ഷേത്രം തെക്കേ നടയിൽ പ്രവർത്തനം തുടങ്ങി.ദേവസ്വം മന്ത്രി .കെ.രാധാകൃഷ്ണനാണ് കുടിവെള്ള വിതരണ പദ്ധതി ഭക്തർക്ക് സമർപ്പിച്ചത്.

ദേവസ്വം ചെയർമാൻ ഡോ.വി.കെ.വിജയൻ, ഭരണ സമിതി അംഗങ്ങളായ മല്ലിശേരി പരമേശ്വരൻ നമ്പൂതിരിപ്പാട്, സി.മനോജ്, ചെങ്ങറ സുരേന്ദ്രൻ , കെ.ആർ.ഗോപിനാഥ്, മനോജ് ബി നായർ, വി.ജി.രവീന്ദ്രൻ ,അഡ്മിനിസ്ട്രേറ്റർ കെ.പി.വിനയൻ എന്നിവർ ചടങ്ങിൽ സന്നിഹിതരായി. മണിക്കൂറിൽ 100 ലിറ്റർ ശുദ്ധജലം നൽകാനാവുന്ന പ്ലാൻ്റാണ് തെക്കേ നടയിൽ സ്ഥാപിച്ചത്.

സേലത്തു നിന്നുള്ള ഗുരുവായൂരപ്പ ഭക്തരുടെ സമർപ്പണമാണിത്. ക്ഷേത്രം കിഴക്കേ നടയിലും ചുറ്റമ്പലത്തിനുള്ളിലും ഉൾപ്പെടെ ഏഴ് കേന്ദ്രങ്ങളിൽ ഈ രീതിയിലുള്ള കുടിവെള്ള വിതരണ സംവിധാനം വരും നാളുകളിൽ പ്രവർത്തനം ആരംഭിക്കും.