പി.കെ. ബിജുവിന്​ അനിൽ അക്കരയുടെ വക്കീൽ നോട്ടീസ്​

തൃശൂർ: സമൂഹ മധ്യത്തിൽ അവഹേളിച്ചെന്ന്​ കാണിച്ച്​ സി.പി.എം സംസ്ഥാന സെക്രട്ടേറിയറ്റ്​ അംഗവും മുൻ എം.പിയുമായ പി.കെ. ബിജുവിന്​ മുൻ എം.എൽ.എ ​അനിൽ അക്കര നോട്ടീസയച്ചു. തൃശൂരിൽ എൽ.ഡി.എഫ്​ സഘടിപ്പിച്ച സഹകാരി മാർച്ചിന്‍റെ ഭാഗമായുള്ള പ്രതിഷേധ സംഗമത്തിൽ പ്രസംഗിക്കുമ്പോൾ ‘വാച്ച്​ ഡോഗ്​’ എന്ന ആക്ഷേപിച്ചെന്ന് ചൂണ്ടിക്കാട്ടിയാണ് അഭിഭാഷകൻ മുഖേന അനിൽ അക്കര നോട്ടീസ് അയച്ചത്.

കൂടാതെ, അടാട്ട്​ ഫാർമേഴ്​സ്​ ബാങ്ക്​ വിഴുങ്ങിയ വിദ്വാനെന്ന്​ ​കുറ്റപ്പെടുത്തിയതും വടക്കാഞ്ചേരിയിൽ 140 പേർക്ക്​ ലൈഫ്​ മിഷൻ വീട്​ കിട്ടാതിരിക്കാൻ സി.ബി.​ഐയിൽ കേസ്​ കൊടുത്തെന്ന് പറഞ്ഞതും വാസ്തവ വിരുദ്ധവും അവമതിപ്പ്​ സൃഷ്ടിക്കുന്നതുമാണെന്ന്​ നോട്ടീസിൽ പറയുന്നു. 15 ദിവസത്തിനകം മാപ്പ്​ പറയണമെന്നും മാനിഹാനിക്ക് പരിഹാരമായി ഒരു ലക്ഷം രൂപ നൽകണമെന്നുമാണ്​ അഡ്വ. എം. സച്ചിൻ ആനന്ദ്​ മുഖേന അയച്ച നോട്ടീസിൽ പറയുന്നത്