യുദ്ധഭീഷണി,മിസൈൽ ലോഞ്ചറുകൾ തീരത്തേക്ക് നീക്കി ഇറാൻ
തെഹ്റാൻ : അമേരിക്കൻ നാവികവ്യൂഹം പേർഷ്യൻ ഗൾഫിലേക്ക് നീങ്ങുന്നതിനിടെ, തിരിച്ചടിക്കാനൊരുങ്ങി ഇറാൻ. ഇറാന്റെ കരുത്തരായ റെവല്യൂഷണറി ഗാർഡ്സ് (IRGC), ഹോർമുസ്ഗാൻ പ്രവിശ്യയിലെ തീരദേശ റോഡുകളുടനീളം കപ്പൽ വിരുദ്ധ മിസൈലുകളും (Anti-ship missiles) ലോഞ്ചറുകളും വൻതോതിൽ വിന്യസിക്കുന്നതായി റിപ്പോർട്ടുകൾ. ഹൊർമുസ് കടലിടുക്കിന് സമീപമുള്ള തന്ത്രപ്രധാനമായ ഹോർമുസ്ഗാൻ പ്രവിശ്യയിലാണ് ഇറാൻ മിസൈൽ വിന്യാസം നടത്തുന്നത്. അമേരിക്കൻ കപ്പലുകളെ ലക്ഷ്യം വെച്ചാണ് ഈ നീക്കം.
കടലിലെ കപ്പലുകളെ തകർക്കാൻ ശേഷിയുള്ള അത്യാധുനിക മിസൈൽ സംവിധാനങ്ങളാണ് ട്രക്കുകളിലായി തീരദേശ റോഡുകളിലേക്ക് എത്തിക്കുന്നത്. ഏത് സമയത്തും വിക്ഷേപിക്കാൻ സജ്ജമായ രീതിയിലാണ് ഇവയുടെ വിന്യാസം.
ഗൾഫ് മേഖലയിലേക്കുള്ള അമേരിക്കൻ ‘അർമാഡയുടെ’ വരവിനോടുള്ള ഇറാന്റെ ശക്തമായ പ്രതികരണമായാണ് ഇതിനെ അന്താരാഷ്ട്ര നിരീക്ഷകർ വിലയിരുത്തുന്നത്.
മേഖലയിലെ എണ്ണക്കപ്പലുകളുടെ യാത്രയെയും ഇത് ബാധിക്കാൻ സാധ്യതയുണ്ട്. ഇറാൻ കടലിടുക്ക് ഉപരോധിക്കുമോ എന്ന ആശങ്കയും ഉയരുന്നുണ്ട്.ഗൾഫ് മേഖല ഒരു തീപ്പൊരി വീണാൽ കത്താൻ പാകത്തിൽ നിൽക്കുകയാണ്. അമേരിക്കയുടെ സമ്മർദ്ദത്തിന് വഴങ്ങില്ല എന്ന വ്യക്തമായ സന്ദേശമാണ് മിസൈലുകൾ നിരത്തിക്കൊണ്ട് ഇറാൻ നൽകുന്നത്. ഒരു ചെറിയ പിഴവ് പോലും വൻ യുദ്ധത്തിലേക്ക് നയിച്ചേക്കാം.
ഗൾഫ് മേഖല ഒരു തീപ്പൊരി വീണാൽ കത്താൻ പാകത്തിൽ നിൽക്കുകയാണ്. അമേരിക്കയുടെ സമ്മർദ്ദത്തിന് വഴങ്ങില്ല എന്ന വ്യക്തമായ സന്ദേശമാണ് മിസൈലുകൾ നിരത്തിക്കൊണ്ട് ഇറാൻ നൽകുന്നത്. ഒരു ചെറിയ പിഴവ് പോലും വൻ യുദ്ധത്തിലേക്ക് നയിച്ചേക്കാം.
അതെ സമയം ഇറാനുമായുള്ള സംഘർഷം ഏത് നിമിഷവും പൊട്ടിപ്പുറപ്പെട്ടേക്കാമെന്ന സൂചനകളെത്തുടർന്ന് ഇസ്രായേലും അമേരിക്കയും തങ്ങളുടെ സംയുക്ത സൈനിക പ്രതിരോധം പൂർത്തിയാക്കി. അമേരിക്കൻ യുദ്ധക്കപ്പലുകൾ ഇറാന്റെ തീരത്തിന് തൊട്ടടുത്ത് നിലയുറപ്പിച്ചു കഴിഞ്ഞു.
ഇസ്രായേൽ സുരക്ഷാ കാബിനറ്റ് അടിയന്തര യോഗം ചേർന്ന് സ്ഥിതിഗതികൾ വിലയിരുത്തുകയാണ്. റഫ അതിർത്തി തുറക്കുന്നതും ഇറാൻ ഉയർത്തുന്ന ഭീഷണികളുമാണ് പ്രധാന ചർച്ചാവിഷയങ്ങൾ.
അത്യാധുനിക മിസൈൽ പ്രതിരോധ സംവിധാനങ്ങളുമായി (THAAD) അമേരിക്കൻ കപ്പലുകൾ ഇസ്രായേലിലേക്ക് അടുക്കുന്നുണ്ട്. കൂടാതെ, USS Abraham Lincoln വിമാനവാഹിനിക്കപ്പൽ വ്യൂഹം പേർഷ്യൻ ഗൾഫിലെത്തി ഇറാന് തൊട്ടടുത്ത് നിലയുറപ്പിച്ചു
ഇസ്രായേൽ ആകാശപരിധി അടച്ചേക്കുമെന്ന സൂചനയെത്തുടർന്ന് വിദേശ വിമാനക്കമ്പനികൾക്ക് സിവിൽ ഏവിയേഷൻ അതോറിറ്റി ജാഗ്രതാനിർദ്ദേശം നൽകി. എൽ അൽ (El Al) ഉൾപ്പെടെയുള്ള കമ്പനികൾ ടിക്കറ്റ് റദ്ദാക്കുന്നവർക്ക് ഇളവുകൾ പ്രഖ്യാപിച്ചു.
ഇറാന്റെ പക്കൽ 1,500 ഓളം ബാലിസ്റ്റിക് മിസൈലുകൾ ഉണ്ടെങ്കിലും അവ വിക്ഷേപിക്കാനുള്ള ലോഞ്ചറുകളുടെ എണ്ണം പരിമിതമാണെന്ന് ഇസ്രായേൽ രഹസ്യാന്വേഷണ വിഭാഗം വിലയിരുത്തുന്നു.
ഇറാൻ ഭരണകൂടം നാല് ജൂതന്മാരെ കൊലപ്പെടുത്തിയതായി റിപ്പോർട്ടുകളുണ്ട്. ഇവർ പ്രക്ഷോഭങ്ങളിൽ പങ്കെടുത്തവരാണോ എന്ന കാര്യത്തിൽ വ്യക്തതയില്ല.
മേഖലയിലെ സമാധാനം ഒരു നൂൽപ്പാലത്തിലാണ്. ട്രംപ് ഭരണകൂടത്തിന്റെ നിലപാടായിരിക്കും വരും ദിവസങ്ങളിൽ നിർണ്ണായകമാവുക. ഒരു വലിയ വ്യോമാഭ്യാസത്തിന് അമേരിക്ക ഒരുങ്ങുന്നത് ഇറാന് നൽകുന്ന കടുത്ത മുന്നറിയിപ്പാണ്. വരും മണിക്കൂറുകൾ ലോകത്തെ സംബന്ധിച്ചിടത്തോളം അതീവ നിർണ്ണായകമാണ്.