കാഴ്ച മറയുന്ന ക്യാമറ , ഹോണ്ട കമ്പനി നഷ്ടപരിഹാരം നൽകണം

തൃശൂർ : ഹോണ്ട അമേസ് കാറിൻ്റെ റിയർവ്യൂ ക്യാമറ കാഴ്ച മറഞ്ഞ് ശരിയായി പ്രവർത്തിക്കുന്നില്ല എന്നാരോപിച്ച് ഫയൽ ചെയ്ത ഹർജിയിൽ പരാതിക്കാരന് അനുകൂല വിധി. തൃശൂർ പഴയന്നൂർ സ്വദേശി രമേശ് കുമാർ ഫയൽ ചെയ്ത ഹർജിയിലാണ് തൃശൂർ ഒല്ലൂക്കരയിലുള്ള വിഷൻ മോട്ടോർസ് പ്രൈവറ്റ് ലിമിറ്റഡിൻ്റെ മാനേജിങ്ങ് ഡയറക്ടർക്കെതിരെയും ഉത്തർപ്രദേശിലെ ഗ്രേറ്റർ നോയ്ഡയിൽ പ്രവർത്തിച്ചു വരുന്ന ഹോണ്ട കാർസ് ഇന്ത്യാ ലിമിറ്റഡിൻ്റെ മാനേജിങ്ങ് ഡയറക്ടർക്കെതിരെയും ഇപ്രകാരം വിധിയായതു്.

വാഹനം പുറകിലേക്ക് എടുക്കുമ്പോൾ ക്യാമറയിൽ നമ്പർ പ്ലേറ്റിൻ്റെ പ്രതിബിംബം വന്ന് മറയുന്നതിനാൽ, ശരിയായി കാണുവാൻ കഴിയാത്ത അവസ്ഥയായിരുന്നു .പരാതിപ്പെട്ടിട്ടും ഫലമുണ്ടായില്ല. തുടർന്ന് ഹർജി ഫയൽ ചെയ്യുകയായിരുന്നു. കോടതി നിയോഗിച്ച വിദഗ്ദ കമ്മീഷണർ പരിശോധന നടത്തി റിപ്പോർട്ട് സമർപ്പിച്ചു . എതിർകക്ഷികൾ ഹർജിക്കാരന് നൽകിയ വാഹനത്തിൻ്റെ ബ്രോഷറിൽ ഇപ്രകാരം നമ്പർ പ്ലേറ്റിൻ്റെ പ്രതിബിംബം വന്ന് മറയുന്നതു് പ്രദർശിപ്പിച്ചിട്ടില്ലാത്തതാകുന്നു. ഇപ്രകാരം റിയർവ്യു ക്യാമറയിൽ കാണുന്നതിൽ തടസ്സം വരുന്നതു് വാഹനം ഉപയോഗിക്കുന്നവർക്ക് വിഷമം സൃഷ്ടിക്കുമെന്ന് കോടതി വിലയിരുത്തി.

എതിർകക്ഷികളുടെ പ്രവൃത്തി അനുചിത ഇടപാടാണെന്ന് വിലയിരുത്തിയ പ്രസിഡണ്ട് സി.ടി.സാബു, മെമ്പർമാരായ ശ്രീജ.എസ്, ആർ.റാം മോഹൻ എന്നിവരടങ്ങിയ തൃശൂർ ഉപഭോക്തൃ കോടതി തടസ്സം സൃഷ്ടിക്കപ്പടാത്ത ക്യാമറ സ്ഥാപിച്ച് നല്കണമെന്നും അതിന് സാധിച്ചില്ലെങ്കിൽ 15,000 രൂപ നൽകണമെന്നും കൂടാതെ നഷ്ടപരിഹാരമായി 25,000 രൂപ നൽകണമെന്നും ചിലവിലേക്ക് 10,000 രൂപ നൽകണമെന്നും വിധിയിൽ പറയുന്നു. ഹർജിക്കാരന് വേണ്ടി അഡ്വ.ഏ.ഡി.ബെന്നി ഹാജരായി .